المجلس العسكري !!!!!!!!!!!!!!

بصراحه مش قادر أفهم الجماعه بتوع المجلس العسكري. بعد 9 مارس و لما كل جماعات حقوق الانسان وثقت عمليات التعذيب الى قامت بيها الشرطه العسكريه ضد المعتصمين. يومها قام المجلس و انكر حدوث هذا جمله و تفصيلا... النهارده CNN نشرت على لسان عضو فى المجلس ان عمليات كشف العذريه على ال 19 بنت تمت arabic.cnn. virginity.test_acknowledg .

بالامس القرين نفى المجلس ايضا اطلاق النار على المعتصمين يوم 9 ابريل فى ميدان التحرير و بعد كده نفوا الاعتداء على المتظاهرين حول السفاره الاسرائيليه و قتل احدهمز

هل ننتظر قريبا ان يخرج احد اعضاء المجلس على BBC المره دى ليؤكد حدوث ذلك....هوا فيه ايه يا مجلس ؟؟؟؟؟ ليه التعامل مع الشعب بنفس اسلوب مبارك و عصابته. الشعب كبر و نضج و ماكان مسكوت عليه ايام العصابه لن يقبل من احد بعد الان.

الساده الافاضل اعضاء المجلس العسكري:
1- نعلم انكم فوجئتم مثل غيركم بثوره الشعب و لكن مر و قت كاف لاستيعاب الصدمه والتعامل مع الواقع. ما قبل 25 يناير لن يتكرر باي حال من الاحوال.
2- لقد او شك رصيدكم على النفاذ فحافظوا على ما بقى منه لانكم سوف تحتاجوه فى المستقبل.

الاخوان والانتهازيه السياسيه

أنا والله زعلان وانا بكتب الكلام ده لاني كنت اتمنى لو الاخوان بعد الثورة يكونوا اتغيروا عن زمان و يكونوا لتعلموا من اخطاء الماضي. لكن من قبل الثورة لما قيادة الاخوان رفضت رسميا تاييد الثورة واتخذت منها موقفا متخاذل من اجل الإبقاء على شعره العلاقة غير الشرعية التي ربطتهم بنظام مبارك.
الاخوان الذين رغم كل ما فعله مبارك وزبانيتة فيهم لم يثوروا عليه مره بجديه مع أنه سجن و شرد وعذب منهم الكثير و لكنهم بكل ماشوستية لم يريدوا تاييد اي حركه سياسيه ابتداء بكفايه الي الجبهه الوطنية للتغيير و اتخذوا موقف متخاذل من البرادعي وغيره.
الان وبعد إزاله مبارك من الوجود يلعب الاخوان نفس اللعبة مع المجلس العسكري. يصورون للمجلس العسكري ان اوراق اللعبة والشارع معهم و انهم يقدروا يساعدوا اعضاء المجلس العسكري على الخروج الأمن من السلطة مقابل تسليمهم مقاليد البلد. ونسوا وتناسوا نتيجة اخر مره عملوا كده لما باعوا اراده الشعب للجيش سنة ١٩٥٤ وفى الاخر عبد الناصر اداهم الصابونه المحترمه و ظبتهم فى السجون و المعتقلات.
وده كان السبب الرئيسي لمعارضتهم مظاهرات ٢٧ مايو . المجلس عايز هدوء ومش بيحب المناقشة وبيتعامل مع الشعب كانه فى القشلاء المجلس يامر و الشعب يقول حاضر يافندم.
الاخوان لقطوا الرساله وعارضوا المظاهرات وكفروا الدعاة لها ونظموا وقفات مضاده فى محافظات كتير . بس الحمد لله ظهر فشلهم و الشعب قال كلمته إحنا مش حنبيع ثورتنا لاحد من اجل منفعة شخصية.
أصدقائي الاخوان مصر قدامها فرصة العمر للحرية و انتوا قدامكم فرصة العمر عشان تكونوا جماعة شرعية لاول مرة فى تاريخكم و فرصه اكبر للمشاركه فى الحكومات القادمه المهم تراهنوا على الحصان الصح مرة واحده فى تاريخكم لانها حقيقة اهم مره. 

لماذا يجب أن ننزل غداً إلى ميادين التحرير؟

اخترت استعمال هذا العنوان الذي استخدمه اليوم الاستاذ بلال فضل فى مقاله اليوم لاعجابى الشديد به و باعماله. أتفق معه فى الدعوه للنزول غدا للعديد من الاسباب:

1. انتزاع حق الشعب الواضح فى التظاهر السلمى رغما عن اي قوانين وضعتها الحكومه المؤقته.
2. تدريب الشعب على الممارسه السلميه و حقه فى التعبير السلمى عن رأيه.
3. الاصرار على مطالب الثوره المتفق عليها
4. التاكيد على ان الشعب المصرى له العديد من الاراء و الافكار و أن الأختلاف فى الرأي لا يفسد للود قضيه.
5. تدريب الحكام الحاليين و المستقبليين على احترام اراده الشعب و احترام حقه فى التظاهر السلمى

التظاهر السلمى حق مشروع للشعب المصرى و ليس من حق أى جهه أن تسلبنا هذا الحق

الى أين نذهب بمصر

الاختيارات امامنا كشعب هى قليله على عكس المفترض। مصر فى مفترق طرق هل تستمر الثوره ام نبدأ البناء। هل البناء ممكن فى الظروف الحاليه।
هى الثوره نجحت؟؟؟؟؟؟؟؟حقيقى مش عارف
مبارك اتخلع و ولاده محتجزين مؤقتا فى السجن و بعض المتعاونين والمنتفعين والمتربحين من نظامه برده مع ولاده مؤقتا فى السجن। بس هل النظام سقط؟؟؟؟؟هل فيه تغيير؟ هل اصبحنا احرار؟ فين نتيجه هتافنا فى المظاهرات
كرامه حريه عداله اجتماعيه
الكرامه لا تزال منهكه । مبارك و شرطه العادلى اتبدلوا بالمجلس و الشرطه العسكريه الى بيحاولوا يبينوا انهم مختلفين بس الدلائل عكس كده।
الحريه محدش عرف يكون حزب غير الناس الى عندها تمويل منتظم (الاخوان.....السلفيين) لسه الاعلام موجه ولسه منافق بس غير جهه النفاق بدل مبارك اصبح الجيش। الاعلام لسه موجه ضد الحريه و مروج لوجهه نظر الحكام। قانون تجريم الضراب محاكمات عسكريه للمتظاهرين ودعاه الحريه و بطيئه و مؤجله للفاسدين
العداله الاجتماعيه مؤجله لان الوزاره مش فاضيه تفكر فى حد ادنى للاجور او لضرائب تصاعديه
مش عارف اذا كنت صح ولا غلط بس انا شايف ان الثوره لم تبدأ بعد

الى أين تذهب مصر-----1

مصر واقفه دلوقت على مفترق كبير ....نروح يمين ولا شمال ولا نرجع لورا.
فيه نا كتير عايزانا نرجع ورا تانى مش هاقول فلول او اعوان النظام لكن كتير من الناس العاديه حست بالقلق على الحاضر و المستقبل. أجيال كامله اتولدت بعد الثوره وكانت ماتعرفش سياسه او مش مهتمه و كمان مش مسموحلها تشتغل سياسه و بنت حياتها و عيشتها على اساس طالما باكل و بشرب و متجوز و عندى عيال خلاص خلينى فى الساقيه ماشى ...انا ايه يطلعنى بره القطيع مانا عارف اتعامل مع الفساد بادفع رشاوى واكراميات عشان اخلص مصالحى ...عمرى مكان عندى تطلعات كبيره ولا تفرق معايا انهم يدوا الارض لفلان ببلاش او بملاليم ......أنا مالى
الناس دى كتير ....انا وغيرى كنا منهم وكتير من الناس دى مش حاسس ان الثوره دى فرقت معاه للاحسن بالعكس الثوره حينتج عنها عدم استقرار و كساد و انعدام امن و أخوان

المعضله دلوقت ان ازاى نقدر نقنع امثال هؤلاء ان الثوره فيها مصلحتهم..............يتبع